Es gooht nimmi lang,
es schmeggt scho richtig fescht nach Fasnacht,
und "WO IST WALTER"?
Oder besser gsait "WO ISCH OORWURM"?
Oorwurm muesch nid sueche mir zeige Dir uff unserer Hompage wo mir während dr Fasnacht aazträffe sinn.
Do drzue wird e Tracker in Zämmearbet mit dr RäppliApp bi uns uff dr Hauptsyte uffgschalte.
Dört kasch denn gseh wo mir an de "drey scheenschte Dääg" unterwegs sinn.
Ebefalls wärde mir unsere Tracker am zwaite Bummelsunntig am Nomidaag nomol aastelle drmit Du gnau weisch wenn mir d Freiestrooss durablaufe.
Selbstverständligg kasch d RäppliApp au uff dis Händy laade.
18. Hoornig 2026
Sujet 2026
D Wält isch e Zirkus mit vyyle Gleen,
aber nit numme glatti!
Sujet Beschriib
D Wält als Zirkus glatt und froo, isch laider scho lang nimmi eso.
Si isch dischter worden und gar nimmi luschtig, doorum gseet me s unsrem Gloon au aa, aisytig richtig gfruschtet.
Au s Fäärnseeluegen isch nimmi scheen, me gseet numme no dummi Gleen.
Aaber langsam goot dr Vorhang uff, e jeede Bebbi frait sich druff.
D Muulwinggel duets unsrem Gloon uffezie, und mir fraien is uff dr Määntigmoorge frie.
Denn wenns äntlig s obligaate Vieri schloot, und fir e Moment die ganz Wält still stoot.
Voordraab
Glaini und groossi Gleen
Requisit
Gloonmobil mit Giggernillis fir andri Gleen
Guggemajor
Dr greescht Gloon
Spiil
Fäägendi Gleen
Abmarsch Cortège
Mo: Punkt 101 usse 13.30 h / Mi: Punkt 22 inne 14.10 h
06. Hoornig 2026
Proobedaag und Genneraalass
Am Wuchenäändi hämmer zwai bsunderi Dääg dörfe erlääbe.
Am Samschtig het unser zwait Proobedaag unter dr fachkundige Laitig vom Gergő stattgfunde.
Mit viil Engagement und eme guete Oor het er uns dr letscht Schliff für die bevorstehendi Fasnacht verpasst.
D Probe sin konzentriert, lehrriich, luschtig, intensiv, motivierend, kreativ, schwungvoll, energieglade und mitrissend gsi.
Am Sunntig het denn unsere alljöörlichi Genneraalass in gmietliger Atmosphäre stattgfunde.
Mir hänn „S Kuni usem Gundeli“ und „Dr Spitzbueb“ als Speschelgäscht,
wo uns mit ihre Schnitzelbängg verwöhnt händ, dörfe begriesse.
Unser Sujet 2026 hämmer präsentiert und Oorwurm het sis neue Repertoire vorgstellt.
Bi guete Gspröch, Musig und beschter Stimmig isch dr Zauber vo dr Fasnacht
und d Vorfreud uf die kommendi Fasnachtszyt bi allne spürbar gsi.
E härzliggs Danggscheen gilt allne Aktive, em Gergő, de zwai Schnitzelbängg
und natürlich unsere Gönnerinne und Gönner für ihri wertvolli Unterstytzig.
26. Jänner 2026
E guets neus Joor,
es schmeggt nach Fasnacht und
d Blagette isch duss.
Mir wynsche allene e guets neus Joor.
Jetzt goohts in grosse Schritt richtig Fasnacht. Es gooht nämlig keini 50 Daag me bis zem Morgestraich.
Am 24. Jänner hämmer unsere zwaite Proobedaag und am Sunntig 25. Jänner unsere Genneraalass.
Wenn au wotsch drbi sii denn meld dich aa. Das kasch bi jedem Aktive oder über unser Kontaggtformular mache.
D Blagette darfsch bi jedem Mitglied vo Oorwurm bezieh, mr saage Dangge für d Unterstützig.
05. Jänner 2026
Unseri Hompage im neue Kleid
Pünktlich zum Niggi-Näggi het unseri Hompage e neus Design becho.
Mir hoffe dass mir Dich au wyterhin mit unserem Uftritt im Netz könne begeischtere und mir ganz viili Bsuecher dörfe begriesse.
Mir werde sicher s eint oder andere no aapasse und neui Inhält drzue mache.
In dem Sinn wünsche mir Dir e schöni Wiehnachtszyt.
08. Dezämber 2025
Adventszyt oder besser dr Countdown lauft!
Es goht keini 90 Daag meh denn isch Morgestraich.
D Adventszyt stoht scho vor dr Tür und mir sind alli im Wiehnachtsstress.
Aber jetzt kunnt dr Ändspuurt und mir hän glii wieder wünchtlechi Probe.
Das heisst für uns so langsam luege dass d Larve aapasst isch. Bim Kostüm so langsam d Güfeli durch Fade ersetzt wird
und s Instrument e Service bekunnt. D Vorbereitige für dr Genneraalass laufe au bereits uff hochtoure
und mir hän alli neue Stückli verteilt und au scho duuregspielt.
Jetzt no d Stückli chli schliffe drmits denn au an dr Fasnacht guet tönt und mir unseri Zuehörer au könne begeischtere.
Wenn Du scho vor dr Fasnacht wotsch driiloose denn mäld Di doch als Gönner bi uns und chummm
am 25. Jänner 2026 zu uns ins Probi z Rynach.
Oorwurm Basel wünscht alle zämme e scheeni und besinliggi Wienachtszyt.
27. Novämber 2025
1. Probesamstig und "uffTAGGT" in Brattele
Glii isch es sowit und mir hän an eme Samstig im Oktober unsere 1. Probesamstig.
D Muko hett fascht alli neue Stückli parat. Punkt Nüni gohts loos und mir probe dr ganzi Daag.
Am Oobe gniesse mir denn alli zämme e gmietlichs Nachtesse und lööhn dr Daag loh ussklinge.
Am 15. November dörfe mir denn in Brattele am "uffTAGGT" vo de Nuggi-Spugger ufträtte.....
Mir freue uns au dört s eint oder andere bekannte Gsicht z gse.
07. Oggdoober 2025
Die erschte Proobe, tolls Sujet und d Fasnacht im Visier.
Nach dr zweite Gsamtproob vo dr neue Saison stööhn die erschte Registerproobe aa. Die neue Stückli werde mir in dääne Proobe ins Detail aaluuege.
S Sujet hämmer bestumme und d Kostümkommission het d Arbet uffgno. Sie sin dra e tolls Sujet für d Fasnacht 2026 umzsetzte.
Mehr verroote mir an däre Stell aber noonig.
Dr Fasnachtnachtplan isch au bereits am endstooh und nimmt langsam aber sicher Form aa.
Mitti Oktober findet denn unsere erschte Proobedaag statt.
Nach dem musikalische Daag werde mir denn au zoobe no chli s Gsellschaftliche pflege.
Mir sueche allewyl no Verstärkig, vorallem im tiefe Blääch "Bass ka me nie gnueg ha!".
Mäld di unverbindligg bi uns!
28. Auguschte 2025
Mir starte in die neu Saison!
D Summerferie neige sich am Ändi zue. Am Mittwuch 13. Augschte 2025 starte mir offiziell in d Saison 25/26.
D MUKo isch scho flissig an de Vorbereitige vo de neue Stückli.
Unseri Mitglieder sind sich am Gedangge mache was mir den könnte für e Sujet usspiiile.
So blibts spannend und mir sind gspannt und freue uns.
Wenn au Interesse hesch, e Teil vo Oorwurm z werde,
denn mäld dich bi uns!
Kontaggtformular
31. Juli 2025
Mir sueche e neue Major/In!
Nach dr Fasnacht 2026 tritt unsere langjährige Major zrugg in d Raaie.
Mir saage jetzt scho viile Dangg und Resbäggt für sini grossi Leistig.
Dorum bietet sich e ganz spezielli Glägehait.
Bisch Du DÄ oder DIE wo uns in Zuekunft duur d Gasse fiirt?
Mir sueche e motivierti, charismatischi und musikalisch versierti Person,
wo mit Härzbluet und Liebi zer Basler Fasnacht dr Takt bi Oorwurm aagee will.
Wenn Du Erfahrig hesch als Major und e grosses Taggtgfühl in alle Belange mitbringsch, meld Di bi uns!
Mäld Di jetzt – mir freue uns uf Di!
Kontaggtformular
10. Juli 2025
Oorwurm Basel isch offiziell e Verein!
Was 2013 als luschtigi und kreativi Guggemusig aagfange het,
het sich in de letschte Joor zu ere feschte Grössi mit vill Härzbluet, Musig und Fasnachtsgeist entwicklet.
Am 18. Juni 2025 hän mir jetzt dr wichtigi Schritt gmacht
und d Fasnachtsgsellschaft Oorwurm Basel offiziell als Verein gründet.
Mit dere Vereinsgründig schaffe mir meer Stabilität und Struktur für Zuekünftigs zum zämme witer wachse,
neui Projäkt aazpacke und d’Basler Fasnacht mit unserem ureigene Stil z beriichere.
Unser Ziel
Mir wänn e Musigfamilie sii, wo Platz het für Kreativität, Spass, Experiment und traditionelli Fasnachtskultur.
22. Juni 2025
Verstärking gsuecht!
Hesch au Luscht, bi Oorwurm Basel drbi z’sii?
Mir sueche vor allem
Sousaphonist/inne und Posaunist/inne!
Uff de folgende Instrument hämmer no wenigi Plätzli z vergä.
1. Trompete
Tom-Drum
Bass-Drum
Do findsch s Kontaktformular für Neumitglieder
oder nimmsch mit eme Mitglied Kontakt uff.
1. Maie 2025